FAZO Reklama kabinetida yuzlab ko‘rsatkich bor. Ularning aksariyati qaror qabul qilishga yordam bermaydi — ular faqat nima bo‘layotganini tasvirlaydi. Biznes uchun ahamiyatlisi to‘rtta raqam.
CPL — lid narxi
Boshlang‘ich raqam. U kampaniyalarni bir-biri bilan solishtirish uchun kerak, lekin faqat bir xil sifatdagi lidlar ichida. Turli auditoriya va turli offerdagi CPL’ni solishtirish — noto‘g‘ri xulosa manbai.
CAC — mijoz narxi
Sarflangan pul bo‘linadi sotib olgan mijozlar soniga. Bu marketingning asosiy raqami. CAC hisoblanmasa, qaysi kanal foyda keltirayotganini bilishning imkoni yo‘q.
AOV — o‘rtacha chek
Bitta mijoz o‘rtacha qancha pul qoldiradi. CAC bilan birga qaralganda rasm to‘liq bo‘ladi: mijoz $30 ga tushsa va o‘rtacha $500 lik xarid qilsa, byudjetni oshirish kerak. Teskari holatda esa reklamani emas, offerni ko‘rish kerak.
LTV — mijozning umumiy qiymati
Mijoz butun hamkorlik davomida qancha olib keladi. Takroriy xarid bo‘ladigan sohalarda (restoran, ta’lim, mebel, xizmat) aynan shu raqam byudjet chegarasini belgilaydi. LTV yuqori bo‘lsa, raqobatchidan qimmatroq CAC to‘lashga ham imkon bo‘ladi — bu strategik ustunlik.
Umumiy qoida: LTV kamida CAC’dan uch barobar katta bo‘lsin. Aks holda o‘sish pulni ko‘paytirmaydi, balki yo‘qotishni tezlashtiradi.
Amalda qanday yo‘lga qo‘yiladi
- CRM da har bir lidga manba yozilsin: qaysi kampaniya, qaysi kreativ.
- Sotuv yopilganda summa yozilsin — AOV shu yerdan chiqadi.
- Har oy oxirida bitta jadval: kanal, sarf, lid, sotuv, CAC, AOV.
- Qaror shu jadval asosida qabul qilinsin, hisobotdagi qamrov asosida emas.
Bu tizim murakkab emas. Ko‘pincha bitta Google Sheets va intizom yetarli. Lekin aynan shu jadval byudjetni oshirish yoki to‘xtatish haqidagi savolga javob beradigan yagona hujjat bo‘ladi.